Rev 1 | ZomZIV | STEP | Pasian in a sawt lo-a tung pah dingte a nasemte tungah lak dingin amah a piak Jesu Christ kilaakna ahi hi. Amah in ama vansawltakte sawlin ama nasem John tungah theisak a,

Revelation of John 1

Thupatna

1 Pasian in a sawt lo-a tung pah dingte a nasemte tungah lak dingin amah a piak Jesu Christ kilaakna ahi hi. Amah in ama vansawltakte sawlin ama nasem John tungah theisak a, 2 John in Pasian thu le Jesu Christ thu teci panna a muh khempeuh teci a pang hi. 3 Hih genkholhna thute a sim mi thupha ngah hi-a, a sunga kigelhte za-a, a lungtanga a kemte thupha ngah ahi hi; bang hang hiam cih leh a hun hong nai ta hi. ^a

Hopihnate le Pasian Phatna

4 John in,

Asia gama pawlpi sagihte tungah:

Tu laitaka om, a omsa le hong pai ding pa le ama kumpi tokhom mai-a kha ^{▼▼1.4 Ahikeh Kha kop sagih} sagihte pan, 5 le a muanhuai teci pa, misi pana a suak masa pen, le leitung kumpite a ukpa, Jesu Christ tung panin hehpihna le lemna no tungah om ta hen.

Eite hong it a, ama sisan hanga i mawhnate pan hong suaktasak, 6 ama Pasian le Pa nasem dinga kumpi-gam le siampi hong hisak ama tungah minthanna le vangliatna a tawntungin om den ta hen! Amen. ^c

7 En un, meiipi tawh amah hong pai hi, ^d
mit khempeuh in amah mu dinga
amah a sunlette nangawn in a mu ding uh hi;
leitung a mite khempeuh ama hangin thum ding uh hi. ^e

Tua bang hi takpi ding hi! Amen.

8 Topa Pasian in, “Keimah, Alpha le Omega, tu laitak a om, a omsa le hong pai ding pa, Thahatpen ka hi hi,” a ci hi.

Mihing Tapa tawh Kibang Khat

9 Jesu sunga eite tanh thuakna, kumpi-gam le sikdotaka na thuakpih pa uh, na sanggampa uh le na pawlpa uh keimah John, Pasian thu hang le Jesu thu teci panna hangin Patmos tuikulh ah ka om hi. 10 Topa’ Ni-in Kha sungah ka om hi, ka nunglam ah pengkul bangin aw ngaih mahmah khat ka za a: 11 “Na muh teng laizial tung khatah gelh inla pawlpi sagih: Ephesus, Smyrna, Pergamum, Thyatira, Sardis, Philadelphia le Laodicea-te tungah khak in,” hong ci hi.

12 Tua kei hong hopih aw en dingin ka kihei hi. Ka kihei khit ciangin kham meivak tunna sagihte ka mu-a, 13 tua meivak tunnate lakah “mihing tapa tawh kibang khat” ^{▼▼1.13 Dan. 7:13} a khepek ciang a bansuk puantualpi khat silhin a awm ah kham awmgak a gak mi khat ka mu hi. 14 A lu le a samte samul bangin ngo in, vuk bangin pak a, a mitte meikuanglai bang hi. 15 A khepekte pummei sunga sumsan hal-am tawh kibang a, a aw tuizeupi ging tawh kibang hi. 16 A taklam khutah aksi sagihte tawi-a, a kam panin a langniha hiam tuak namsau khat hong dawkkhia hi. A maitang, ni a tan pen laitak tawh kibang hi. ^g

17 Amah ka muh ciangin a khephung ah a si bangin ka puk hi. Tua ciangin aman a taklam khut ka tungah nga a: “Lau kei in, keimah, a Masa pen le a Nunung pen ka hi hi. 18 Keimah a Nungta Pa ka hi hi. Ka si zo a, en in a tawntungin ka nungta den hi! Keimah in sihna leh Gawtmun tawhtangte zong ka tawi hi. ^h

19 “Tua ahi manin na muhsate, tu laitak a om le tu nung cianga hong om dingte gelh in. 20 Ka taklam a na muh aksi sagihte le kham meivak sagihte’ thuthuk hih ahi hi: Aksi sagihte pen pawlpi sagihte’ a kem vansawltakte ^{▼▼1.20 Ahikeh thupuakte} hi-a, meivak tunna sagihte pen pawlpi sagihte ahi hi. ^j